إكتشافات منسوبة لغير أصحابها الحقيقيين

بسم الله الرحمن الرحيم

كلنا عارفين أن كريستوفر كولومباس هو مكتشف قارة أمريكا الشمالية. وتوماس إديسون هو مخترع المصباح، والعالم جاليليو جاليلى هو صاحب التلسكوب.. وجراهام بيل هو مخترع الهاتف، والإخوة رايت هما أصحاب أول طيران ناجح فى العالم... ولكن!.

1- التلسكوب.

أول تلسكوب مُخترع فى التاريخ بيرجع للألمانى صانع العدسات (هانز ليبرشى) واللى أستخدم عدسة مقعرة والتانية محدبة لتكبير الصور البعيدة.. وفى سنة 1611 طور التلسكوب بإضافة عدسة عينية لزيادة التكبير والدقة.. لكن جاليليو هو أول شخص استخدم التلسكوب للنظر بيه فى السماء ولكنه مش مخترعه.

2- الراديو.

يُقال أن (ماركونى) هو مخترع الراديو، وفى سنة 1895

قدم ماركونى جهاز غريب، بيقول أنه من اختراعه وهو عبارة عن جهاز راديو بيستقبل موجات لاسلكية.

ولكن الحقيقة أن الجهاز كان من إختراع نيكولا تيسلا.

واللى نشر مقالات مترجمة عن كيفية تصميمة واستعماله وآليته فى استقبال الإشارة.. وكمان عُثر على تسجيلات قديمة لبراءة الإختراع، وبعدها نفى ماركونى أن الراديو كان من إختراعه.

3- المصباح الكهربى.

من المسلمات تقريباً أن توماس أديسون هو مخترع المصباح الكهربى، وده مذكور تقريباً فى كل المقررات الدراسية.. ولكن الحقيقة قد تكون صادمة.. المصباح موجود بالفعل قبل توماس أديسون بحوالى 46 سنة..

والعديد العديد من العلماء والمخترعين عملوا على تطويره. وبترجع المحاولة الأولى لصنعه سنة 1802 للكميائى البريطانى هامفرى ديفى، واللى حصل على ضوء من خلال تمرير تيار كهربى فى خيط رفيع من البلاتينيوم..

ولكن سطوع المصباح كان ضعيف، وفترة عمله كانت قصيرة.. وغير كده كان مُكلف.. ولكن أديسون ساهم فى إن المصباح يكون فترة إضاءته أطول وبتكلفه أقل، ولكن مش مخترعه. - وبسبب التاريخ القذر للراجل ده وأنه كان بيعرض المال على ناس تانية لحل المشاكل ويستغل حاجتهم للمال أنا مش متأكد حتى من أن هو اللى طور المصباح -

4- الطائرة والإخوة رايت.

فى ١٧ ديسمبر سنة ١٩٠٣ نجح الإخوة رايت بالبقاء عالياً لمدة 12 ثانية على ارتفاع 120 قدم فى طائرة ووثقوا المشهد بتصويره. لكن الحقيقة أن فى مهاجر ألمانى

(جوستاف وايتهيد) كان نجح فى محاولة للطيران قبلهم بسنتين.. ولكن عكس الإخوة رايت.. هو معرفش يوثق المشهد ولو بصورة. ومش بس جوستاف اللى سبق الإخوة رايت.. المخترع ريتشارد بيرسى سبقهم ب 9 شهور.. وكان مستخدم تصميم مُختلف عن تصميم رايت.. ولكن بسبب عدم ترويج ريتشارد لابتكاره اتنسب للإخوة رايت.

5- السيارة.

إختراع أول سيارة فى العالم بيُنسب لهنرى فورد وبدأ فى تأسيس شركة تصنيع السيارات سنة 1896.. ولكن قبلها بحوالى 11 سنة، الألمانى كارل بنز.. أبتكر أول سيارة بتعمل من خلال الوقود وسجل براءة إختراع فى السنة اللى بعدها وبدأ بيعها سنة 1888.. ولكن مع ذلك ولعله لا يعلمها أحد بتتنسب لهنرى فورد!.

6- الهاتف وجراهام بيل.

من المعروف على نطاق واسع أن جراهام بيل هو مخترع التليفون.. هو فى الحقيقة كان واحد من عدة مخترعين. لكن فى سنة 2002 مجلس النواب الأمريكى قرر اعتبار انطونيو مويتشى هو المخترع الحقيقى للهاتف مش جراهام بيل..

وحسب قرار مجلس النواب، انطونيو عرض اختراعه فى صحيفة ايطالية سنة 1860.. وفى ديسمبر 1871 طلب الحصول على براءة اختراع مؤقتة.. ولكن بسبب عدم حيازته على المال انتهى العقد سنة 1874..

ولكن جراهام بيل استكمل هو وفريق مشروع انطونيو فى نفس المعمل اللى كان بيشتغل فيه موتشى.. وبعدين عرضه فى معرض دولى فى فيلادلفيا.. وحصل الاختراع على اهتمام شديد واتروج له بصورة شديدة. وبعدها بدأ جراهام ومساعديه على تأسيس شركة لإنتاج التليفون.

7- كولومبوس وقارة أمريكا الشمالية.

المعلومة اللى بتقول ان كولومبوس هو مكتشف أمريكا الشمالية مُقدسة فى دول العالم.. ولكن الاكتشاف الأول تم على إيد بحار سبق كريستوفر اسمه ليف إريكسون.. واللى عمل الرحلة دى قبل ما يتولد كريستوفر ب ٥٠٠ سنة.. وانشأ وقتها الفايكينج قرى على جرين لاند وساحل كندا الشرقى. وكان أول أوربى اكتشف المنطقة دى من العالم.

8- الكينتوسكوب.

سنة 1888 تم اختراع أول آلة عرض سينمائية بتعرض الأفلام بصورة سلسة وفعالة.. وتم إنتساب الإختراع لإديسون.. لكنه فى الحقيقة ملك لوليام ديكسون. وهو واحد من العاملين فى فريق إديسون..

وحاول وليام أنه يحصل على براءة إختراع أكتر من مرة، لكن يقال أن كل شخص وقف فى صفه أتعرض لحوداث مدبرة ومات.. والسبب كان رجل الأعمال اللى عمره ما كان مُخترع توماس إديسون.. وفى سنة 1913 حصل اديسون على وسام ألبرت للجمعية الملكية وعلى الميدالية الذهبية سنة 1928.

والسلام ختام